Maharashtra Traditional Games : छत्रपती शिवाजी महाराज यांच्या राज्याभिषेकाला 350 वर्ष आणि पुण्यश्लोक अहिल्यादेवी होळकर यांच्या 300 व्या जयंतीचे औचित्य साधत पारंपरिक खेळांना प्रोत्साहन देण्याचे उद्देशाने कौशल्य विकास, रोजगार आणि नाविन्यता मंत्री मंगलप्रभात लोढा यांच्या संकल्पनेतून क्रीडा महाकुंभ स्पर्धेचे आयोजन करण्यात आले आहे.
2 मार्चपासून 9 मार्चपर्यंत हा क्रीडा महाकुंभ राज्यात सुरू राहणार आहे. या स्पर्धेत कब्बडी आणि खो-खो हे जागतिक दर्जाचे खेळ आहेत. त्याचबरोबर लगोरी, लेझिम, लंगडी, विटी दांडू सह 12 पारंपरिक खेळांचा समावेश या क्रीडा महाकुंभात करण्यात आला आहे. 2 आणि 3 मार्च रोजी आयटीआय स्तरावर, 4 आणि 5 मार्च रोजी जिल्हास्तरावर तर 7 ते 9 मार्च पर्यंत नाशिक विभागीय स्तरावर ह्या क्रीडा कुंभाची सांगता होईल. विजेत्यांना आकर्षक पारितोषिक तर सहभागी खेळाडूंना प्रमाणपत्र देण्यात येणार आहेत. या स्पर्धेत जास्तीत जास्त तरुण तरुणींनी सहभाग घेऊन महाराष्ट्रातील पारंपरिक खेळांना आणखी दर्जेदार करून आपली मराठी संस्कृती जपावी आणि हे खेळ जागतिक स्तरावर पोहचवावे असे आवाहन मंत्री लोढा यांनी केले आहे.
क्रीडा महाकुंभात सहभागी होण्याची प्रक्रिया
या स्पर्धेत भाग घेण्यासाठी एक क्यू आर कोड scan करावा लागणार आहे. तसेच इच्छुक खेळाडूंनी क्रीडा कुंभसाठी नियुक्त केलेले प्रभारी किंवा संबंधित आय टी आयच्या मुख्याध्यापकांकडे नोंदणी करायची आहे. या स्पर्धेत सहभागी होण्यासाठी नाममात्र 10 रुपये प्रवेश शुल्क आकारण्यात आले असून ते रिफंड अर्थात पुन्हा स्पर्धकांना परत देण्यात येणार आहे. गुंफुनी स्वदेशी खेळाची माळ…जोडूया भारतीय संस्कृतीशी नाळ हे ब्रीद वाक्य घेऊन मंत्री लोढा यांच्या पुढाकाराने या अभिनव स्पर्धेचे आयोजन करण्यात आले आहे. या क्रीडा महाकुंभात दंड बैठक, लेझिम, पंजा लढवणे, रस्सी खेच, लंगडी, दोरीवरच्या उड्या, कब्बडी, फुगडी, खो खो, विटी दांडू आणि लगोरी या पारंपरिक खेळांचा समावेश करण्यात आला आहे. महिला आणि पुरुष दोन्ही गटात या स्पर्धा खेळवल्या जाणार आहेत.
